- 499 -

1417. Sept. 26. o. O.

Jorg von Nymancz, Meister und Gebietiger des Matthias-Hospitals des Kreuzherrn- Ordens in Breslau tritt das Hospital St. Nicolaus an die Stadt Liegnitz ab.

In dem namen der heylegen vnd vnteylichen dreyfaldykeyt amen. Wenne alle ding sich in der czeyt vorwandiln vnde mit der czeyt weg geen, so ist is not, das man dy ding mit schriftlichen briffen vnde geczugnisse der menschen bestetege vnde vorewege, dorumme wir brudir Jorge von Nymancz meystir vnde gebyteger des spetals czu synte Mathis in Bresslaw der creuczetreger mit dem sterne vnde des ganczen ordins in Slezia bekennen offintlich in desim briffe allen den, dy en sehen adir horin lesin, das vor vns komen sint der erber vnde weysir burgermeyster vnde ratmanne der stat czu Legenicz Conrad Brockindorff, Hannos Girdan, Hannus Geysilher, Niclas Popelaw, Hannus Mittelaw vnde Mertin Polen vnde dy schepphin doselbist Petir Vngerotin, Niclos Elle, Andris Geythan, Pawel Thamme, Andris Prewse, Petir Hertil vnde Jokob Gor von gemeynem rate der eldisten, der gesworn allir hantwerke vnde der ganczen gemeyne der stat Legenicz vnde habin vns fleysiclich gebethin vnde demuticlich von vns begeret das spetal czu synte Niclase vor der stat Legenicz wertlich vnde leyplich czubesorgen vnde czuvorwesen vnde durch besserunge wille des gebawdis vnde merunge der armen sichen; das spetal wir gehabit han in beuelunge von dem irluchten fursten herczogen Heynrich eynes seligen gedechtenisses hirren der stat Legenicz vnde des landis vnde stifters des selbigen spetals mit allir freyunge vnde an alle beswerunge allis dynstins mit allir czugeheronge vnde das sey wir vorgenantir brudir Jorge meyster vnde gebyteger des vorgenanten ordins czu rate vnde eyne worden mit vnsirn eldisten brudirn in eyme gemeynen capet mit brudir Johannes Seydil von Strelan vnsirm prior, brudir Dominik Herink pharrer czu synte Elyzabeth czu Bresslaw, brudir Jorgen pharrer czu Crewczeborg, brudirn Jokannose Cottelern Comptor czur Sweydenicz, brudirn Nicolao Grotkaw comptorn czu Monstirberg, brudirn Petir Newnicz comptorn czum Bonczlaw vnd vnsirm sybprior, brudirn Bartholomeo comptorn czu Legenicz, brudirn Heyncko comptorn czu Crewczeborg vnde brudir Niclas vnsirm koschinmeyster vnde mit willen allir brudir des ganczen ordins in Slezia vnde haben an gesen den gebrechen das spetals vnde der armen sichen vnd durch beserunge wille, vnde das man ir deste meer dorynne mag gehalden, habin wir vnde: vnair nochkomelynge dem rate vnde den schepphin vnde der ganczen gemeyne vnde allen eren nochkomelyngen der stat Legenicz abe getreten das vorgenante spetal vnde vorreycht vor dem erenwirdegen in gote vatir vnde hochgebornen forsten vnde herren herczogen Wenczlaw bysschoffe czu Bresslaw vnde erbhirren czu Legenicz vnsirm genedegen liben hirren, alz vor eynen rechten erbhirren, mit allen czynsen, dy vormols eyne meysterynne von der sichen wegen gehapt hat vnde mit allir werltlichen vnde leyplicher besorgunge vnde hantlangunge, der wir vns geawsint habin vnde itczunt awsin, wy dy en von vns gescheen ist, mit speyse, mit tranke, mit gelde adir mit getreyde, von dem hawse adir aus dem vorberke, wy dy nu gescheen ist in eyner guten gewonheyt, der wellen wir vnde vnsir nochkomelynge nu vnde eweclichen an alle ansproche allir lewte ledig vnde frey seyn, sunderlichen aus genomen dy geystliche hantlangunge vnde speysunge des heylegen leychnams vnde der heylegen olunge vnde mit der beychte vnde mit der lezunge dreyer messen alle wochin in der capellan czu sante Elyzabeth, dy wir vns, vnsirm ordin vnde nochkomelyngen behaldin vnde habin sullen, alz wir sye von erster stiftunge gehabit habin. Awch habin sye vns, vnsirm ordin vnde alle vnsirn nochkomelyngen mit der ganczen gemeyne wille vorschrebin czwelf mark jerlichir vnde eweger czynse vff das vorgenante spetal vnde vff alle czynse vnde renten vnde czugehorunge, dy is itczunt hat adir hernochmolis mochte gehabin, bewegelich adir vnbewegelich, wy man das mit dem namen mag benennen, vnde dy selben czwelf mark czynses sal gebin der spetal meyster vns, vnsirm ordin vnde allen vnsirn nochkomelyngen adir wer von der stad gesaczt wirt czu den geczeyten czu eyme schaffer uff dy tage, dy hernoch geschrebin sten. Czum ersten uff sante Walpurgen tag, der nu neste czukunftik wirt, sechs mark gutir groschin Bemischer moncze Polnischer czal, so sal dy erste gulde an tretin. Dornoch uff synte Michels tag awch sechs mark groschin vnde das sal eyn iczlicher schaffer geben, der von der stad weyne wirt gesaczt alz eyn vorweser des spetals, vns, vnsirm ordin vnde alle vnsirn nochkomelyngen, dy do itczund seyn adir hernochmolis werdin mogin, alle jar vnvorczogelich vnde an alle wedirrede vnde mormulunge uff dy tage, alz vorgeschrebin stet, von allen czynsen vnde renten vnde czugehorunge, dy is itczund hat adir hernochmolis wirt habin, is sey bewegelich adir vnbewegelich, vnde das sal ewiclich gehaldin werdin. Vnde ap der schaffer, der czu den geczeyten wirt seyn adir ist, der czynse vns, vnsirm ordin vnde vnsirn nochkomelyngen nichten gebe adir, nicht gebin weide uff dy tage, alze vorgeschrebin stet vnde gereth ist, vnde sich weide wedirsperren adir do wedir sprechin, so sulle wir, vnsir ordin vnde nochkomelynge den rat czu Legenicz, der czu denselbin geczeyten wirt seyn vnde dy gancze gemeyne der stad czu Legenicz an ruffen vnde vormanen, alz dy vorweser des spitals. So sullen sye adir wer ratmanne czu der czeyt seyn werdin, denne vns, vnsirm ordin vnde nochkomelyngen helfin, schicken vnde denken, das vns, vnsirm ordin vnde nochkomelyngen der czyns ane hyndirnis gegebin werde, is sey mit gunst adir mit hulfe des rechten, das wir vns, vnsir ordin vnde nochkomelynge mogin irholin an allen iren czynsen vnde renten vnde gutern vnde czugehorungen des vorgenanten spetals, is sey bewegelich adir vnbewegelich, wy man das mit dem namen benennen mag, keyns ausgenomen. Awch gebe wir dem vorgenanten spetal den holcz czol; awch gebe wir ym vnsir kosche vnde des hoffis virczyk elen in dy lenge czu messen von der sowlen an der ecken der koschin dy twer obir den born vnde nedewenik in dy weyte keygen der stad wert uff dy czweselechte weyde adir keygen dem czawne in dy breyte newnvndczwenczik elen breyt vnd sye eyne want uff dy grencze seczen sullen nicht hoyr wenne vir elen hoch vnde dy selbe want das spetal selbir haldin sal vnde ynnewenik der want in des spetals hoffe an dy selbe want keygen vns keyn gebawde seczen sullen, das vns adir dy vnsirn mochte gehindern adir geschaden an dem lichte vnsirs hawsis adir von gestankis wegen. Awch sal den sychen das spetals der vorgenante born habl (!) dynen vnde vns vnde vnsirm hawsse dy andir helfte dynen, vnde was von vnsirm teyle des bornis geet, das is mittenandir weg geet vnde flysse; adir reyn wassir von vnsirm hawse vnde awch obene hernedir, das sal geen vngehindirt vnde geleytet werdin vndir der greniczen wand in das gerynne, das von der sychen teyle des bornis geet, das is mittenandir weg flysse in der sychen teyle noch des aldin briffis lawte, den wir vnde vnsir ordin der stat Legenicz dorobir gegebin habin. Awch gebe wir dem spetal mit gutem willen vnde mit rate allir vnsir brudir den garten gancz vnde gar. der hynder der kyrschen (!) stet, vnde greniczt mit dem kyrschhoffe alzo lang vnde breyt, alz her itczund vmmeczewnit ist, dach mit sulchir vndirscheyde, das wir, brudir Jorge meyster vnde gebiteger des spetals czu Bresslaw czu synte Mathis des vorgenanten ordins behaldin vns vnser vorhaws mit dem gange vor der tor, alz man uf den kyrschhoff geet virczehen elen lang vnde mit allir czugehorunge, alz wir is von erstir stiftunge gehabit habin in, allen greniczen vnde noczbarkeyten der czynse. Awch welle wir, das der schaffer dy kyrsche beluchten sal mit wandilkerczen vnde mit steckelichten vnde uff Ostirn mit eyn'er ostirkerczen vnde mit grabelichten noch dem rechte alz wir is vorgehabit habin vnde eyne iczliche spetalmeysterynne voraws gericht hat. Das sal nu thuen der spetalmeyster adir wer gesaczt wirt von dem rate. Awch welle wir vnde vnsir ordin den kyrschhoff frey habin vnvorengit, das das spetal nichtisnicht dorobir czugebiten sulle habin, sundir dem spetal hantlangen vnde dynen sal czu der bygrafft vnde czubegrabin dy toten des spetals mit rate vnde wissens eyns comptors adir eyns prioris, das wir dem graber weysen, wo her graben sal, vnd das ist dorumme, das wir nicht wellen, das man vns adir den vnsirn mochte vnwillen beweysen vnde graben vor vnser tor, das welle wir obirhabin seyn. Awch sulle wir vnde vnser nochkomelynge adir welscher (!) comptor ist czu Legenicz vnde dy brudir, dy mit ym do wonen, dy lampe haldin in der kyrschen czu synte Niclase czu Legenicz vnde sye vorlegen vorwert meer in allir mosse, alz sye vormols gehaldin ist vnde vorlegit. Awch behalde wir vorgenantir brudir Jorge meyster vnde gebyteger des spetals czu synte Mathis des ordins der crewczetreger mit dem sterne vnsir vorberk vor Legenicz czu dem hawse mit allin gertenern, mit allir czugehorunge, keyns ausgenomen, vnde awch mit dem garten, der do leyt bey dem vorberge vnde ist geheysen vormols der meysteryrine garten, do das gesprink ynne ist, awch mit allir czugehorunge, acker, wesewachs, holcz in allirleye weyse, alz wir is besessen habin, an alle wedirrede. Awch behalde wir vnsirm hawse dy czynse, dy vormols eyn iczlischer comptor gehabin hat vnde awch allin czyns getreyde. Awch behalde wir vns eyn frey tor keygen der gassen keygen der stad wert yn vnde aus czu faren, alz vns vnde den vnsirn notdorfft ist. Das globe wir brudir Jorge von Nymancz meyster vnde gebytegir des spetals czu sinte Mathis in Bresslaw vnde vnsir eldisten brudir, dy vorgenanten, vnde alle vnsir brudir des ganczen ordins in Slezia vnde alle vnser nochkomelinge bey trewen vnde bey eren gancz vnde vnvorruclich vnde ewiclich czu haldin. Czu geczugnisse alle desir sachen vnde desis briffis desir lyplichen vnde fruntlichen eynunge vnd czu eynir ewigen bestetegunge haben wir vorgenanter brudir Jorge meyster vnde gebyteger des vorgenanten ordins an desin briff lossen hengen das segil vnser meystereye vnde owch das segil vnsirs conuentes. Gegeben am sontage vor sante Michels tage, noch gotis gebort virczenhundirt jar dornoch in deme sebinczenden jare.

O. d. St. L. No. 262. Mit beiden anhangenden Siegeln, an Schnüren von rother Seide.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866